فى البدايه اشكر كل من ساعدنا فى داخل الحجز او من خارجه

واشكر كل من شارك فى المظاهره وصرخ وهتف مطالباً بالحريه

واشكر العسكرى اللى شدنى على الجراج

ونحكى بقى من اول الجراج :
إحتجاز 50 شاب بجراج :

انا اول ما وصلت للمظاهره ولسه بحط رجلى جواها يادوب لقيت الظابط بيقول للعسكرى شدلى الواد دا وشدنى جرى بيه امين الشرطه على الجراج بتاع كايرو سنتر اللى فى الشارع اللى قدام مجلس الشورى لقيت ناس كتير جوا وناس كتير بتتسحب جوا كمان المهم كل شويه كانت بتحصل مشادات كلاميه وبالأيد بينا وبين امناء الشرطه لحد ما هدينا وكتبنا اسماءنا كلها عشان نديها للناس برا

اللى منشوره هنا : http://www.ikhwanonline.com/Article.asp?ArtID=62984&SecID=230

المهم بدأو يخرجونا واحد واحد ويفتشونا تفتيش بطريقه بشعه ويدورا على كروت الميمورى اللى فى الموبايل وخدو الشرايح بتاعتنا كلها وطلعنا على عربيات ترحيلات.
نقل 31 شاب فى عربة ترحيلات واحده :

العربيه اللى كنت فيها كان فيها 31 واحد وكان معانا جنات عبد العليم طبعاً الفتره بتاعت العربيه كلها كانت حر وخنقه بس قضينها شويه ضحك شويه نقول حنعمل ايه وناس بتابع الطريق عشان تشوف احنا رايحين فين وناس بتابع فى الموبيلات اللى كانوا مخبينها لحد ما وصلنا معسكر السلام العسكرى اللى قدام موقف العاشر .
إحتجاز 91 شاب بمعسكر السلام :

بدأنا فى دخول معسكر السلام بردو تفتيش جامد ودخلنا كلنا جوا لحد ما اكتمل العدد 91 شاب بدأو يعرضونا واحد ورا التانى على شوية ناس من امن الدوله عشان يعرفوا احنا مين وينقلو اللى يتعرض فى زنزانه تانيه لحد ما بقت الزنزانه التانيه فيها 91 شاب وبعدين قسمونا 45 فى زنزانه و 46 فى زنزانه وقعدنا كتير لحد ما بدأنا نهتف ونسقف بدأو يهتموا بينا وجابولنا اكل وقالولنا ثوانى بنخلص الورق وفاجأه لقيناهم بينادوا اسامى ( الناس المعروفه ) و بياخدوهم بره ( 33 واحد ) كلبشونا وطلعونا عربية ترحيلات ورحنا على حجز النيابه .
إحتجاز 33 شاب بحجز نيابة جنوب القاهره والإفراج عن
الباقى :

دخلنا حجز النيابه وفضلنا قاعدين فتره طويله قعدنا ننظم نفسنا ونتفق حنعمل ايه ونغنى ونهزر وكل حاجه وبدأو يعرضونا على النيابه طبعاً انا معرفش الوقت لأنهم خدوا مننا الساعات كمان بس الوقت كان متأخر لأننا قعدنا كتير والفجر أذن لما نزلنا من عند وكيل النيابه

المهم دى التهم بتاعت وكيل النيابه :

وبالمحضر رقم 3288 لسنة 2010 جنح قصر النيل تقدم المتهميين الي النيابة

ووجهت النيابة للمتهمين التهم التالية :

1- الأشتراك في جماعة الغرض منها الدعوة الي منهاضة المباديء الأساسية التي يقوم عليها نظام الحكم في الدولة والتحريض علي كراهيتها والأزدراء منها.

2- تعريض سلامة وسائل النقل البرية للخطر عمداً وتعطيل سيرها

3- تعطيل تنفيذ القوانين واللوائخ والتأثير علي السلطات في عملها

4- التعدي علي موظفيين عموميين وهم رجال الشرطة المبين اسماءهم بالقوة والعنف اثناء تأدية وظيفتهم وبسببها ونشأ عن ذلك جروح علي النحو المبيين بالأوراق والتقارير الطبية المرفقة.

5 – الأتلاف عمداً الأشياء المبينة بالأوراق وهي الخوذ والسيارات والدروع .. الخ

6- الأشتراك في مظاهرة لقبل نظام الحكم

7- الأشتراك في تجمهر مكون من أكثر من 5 أشخاص مما يشكل جريمة
إحتجاز 33 شاب بقسم قصر النيل لمقابلة هانى جرجس :

روحنا كلنا قسم قصر النيل وقابلنا هانى جرجس مامور القسم اللى هوا مقدم فينا البلاغ وبدا يطلعونا يعملو الفيش والتشيبه بتاعهم دا وقعدنا حوالى 3 ساعات وبعدها قالو حيرحلو المحافظات .
ترحيل 13شاب الى الاقسام التابعين لهم:
خدوانا 13واحدمن المناطق (المرج_عين شمس _مدينة نصر_الزيتون_مصرالجديده_النزها_المعادى_شبرا)
وفى ناس كتير اتعرضت للتعزيب زيى يعنى
وانا ودونى قسم المرج وقعدو يشتمونى شتايم فظيعه ويضربونى ضرب وسخ جدا وفى الاخر بعد ما طلع عينى انا وواحد اسمه عبد الرحمن كان معايا واقعدنا نبوس دماغ الناس هناك وربنا كرما بظابط ابن حلال خلصلنا الورق وطلعنا يوم 8ابريل الساعه 6صباحا