كانت السينما المصريه قديما سباقه فى كل شى .. فقد جسد فيلم العتبه الخضره بطولة الراحلين اسماعيل يس واحمد مظهر حقيقه واقعيه نعيشها فى تلك الأيام .. فقد تناول الفيلم قصة صعيدى يملك الكثير من المال يحتال عليه احد المحتالين ويبيع له ميدان العتبه وجراج العتبه والمطافى وقسم الشرطة وبطريقه كوميديه تمثال ابو اصبع ( تمثال سعد زغلول ) وتناول الفيلم قصة ذلك الشاب عندما قام بمطالبة قسم الشرطة بالإيجار المستحق عليهم وخلع يافطة ميدان العتبه وتعليق يافطة مكتوب عليها ميدان عديله اسم محبوبته فى الفيلم .. وفى اخر الفيلم وعد احمد مظهر بعد خروجه من السجن ببيعه الهرم وابو الهول
فالذى ينظر إلى اوخر الخمسينيات ويشاهد هذا الفيلم يتصور انه من ضرب الخيال .. ولكنه الان واقع نتعايش فيه .. وبعض الشزرمه والهبيشه تطالب به تحت قبة البرلمان ... فالبلد جميعها اتباعت تحت قانون ما يسمى بالخصخصه والأستثمار الحر .. واصبحت املاك الدوله اى املاك الشعب .. تحولت بقدرة قادر لأملاك بعض الأجانب واليهود تحت مسمى المستثمرين الأجانب مرر قانون الخصخصه وسرح الكثير من العمال والعماله الفنيه المهره مقابل قانون عمل هش هزيل لم يصمد امام هذا التيار الجامح لحمايه حقوق العامل والموظف ... وظلم الكثير واحيل الكثير للتقاعد فى بيتهم فى سن الأربعين .. سن الشباب كما تقول عليه الحكومه ....
بيعت شركة النظافه لشركات ايطاليه واسبانيه ولمت الملايين من قوت الشعب الغلبان وكانها ضريبه على فاتوره الكهرباء بمبالغ لا يعقل ان دفع المواطن 10 جنيه زباله على فاتوره الكهرباء وهو اصلا معندوهش زباله وهو اصلا بيدفع للزبال الخاص 3 او 5 جنيه وبيجى الزبال لحد باب بيته بياخدها الصبح فلم تتركم الزباله يوم واحد فلماذا استقطبتوا الأجانب للم زبالتنا هو احنا مش عارفين نعالجها ( يعنى الحكومه كانها قالت للشعب انتم زى العيال عاوزين حد يدخلكم الحمام ويلبسكم بعدها )
وهكذا استمر الحال فى البلد .. والكل صبر واحتسبها عند ربه ولكن عندما يخرج لنا صاحب فروة الشعر الجنان ( ابو قصه جنان يا مسبسب يا بن عز ) ويطالب بتجاره الأثار داخل مصر .. يبقى ده اسمه استهبال لمعنى الوطنيه .. ازاى اتاجر فى الأثار .. انت عاوز ايه يابن عز من الشعب ؟؟
عايز الكل يسيب تعليمه وجامعته ويجرى وراء الهرم وعلى طريق الفيوم يحفر فى الرمل على امل يلاقى قط فرعونى محنط يبيعه بكام الف .. مش كفايه دمرت الشباب لما وصلت سعر طن الحديد لــ 9 الاف جنيه ومبقاش حد عارف يتجوز ولا يبنى واصابة الشباب بالأكتئاب والأحباط والزهق من البلد
عايز ايه بعد تصريحك الغبى والملل عندما قلت ان اطنان الزباله المتكرسه فى شوارع القاهره تدل على رخاء ورفاهيه الشعب المصرى ... لا وانت الصادق بيدل على حكومه واطيه مش شايفه شغلها
عاوز ايه من البلد ... ؟؟
عاوز تبيع 7 الاف سنه من الحضاره فى سوق الجمعه ؟
بكره تطالب ببيع الأطفال والرقيق واعضاء البشريه وفتح سوق لها فى السبتيه ؟
وبكره هتطالب ببيع المواطن المصرى كأئنه كائن غريب عن باقى البشر بسبب سياستكم الحقيره وبسبب ما فعلتم فيه ؟
وياريت بعد كدا محدش يغنى لحتشبسوت لانها مش هتبقى ملكنا بقدرت قادر هتبقى ملك العم زعروب ملك الخيار فى مصر الذى اشتراها مؤخرا وبيقاضى كل من يتكلم عنها .. لانه بيغير عليها اوى ... شرفه ياخى

انا عرفت دلوقتى مين اللى كان بيسرق المتحف المصرى فى السنوات السابقه ومين اللى سرق لوحات محمد على من متحفه ورجعها تانى مقطوعه انصاص فى اخر عمليه سرقه لم يتهم فيها احد فى ظل التغنى فى كل مناسبه بوزاره داخليه قوية ؟

واكيد انتم عرفتوا مين ؟
ومفيش ابرد من كدا
---------